د ګمرکونو او عوایدو معینیت د اړوندو ریاستونو تر منځ د همغږۍ ناسته وسوه!
د غویي ۲۳مه ۱۴۰۴هـ.ل
د مالیې وزارت د ګمرکونو او عوایدو معینیت د اړوندو ریاستونو تر منځ د (۱۴۰۴) کال د همغږۍ دوهمه ناسته د ګمرکونو او عوایدو معین الحاج مفتي عبدالمتین سعید په مشرۍ د یاد معینیت د غونډو په تالار کي وسوه.
په دې ناسته کي، چي د اړوندو ریاستونو مسئولینو ګډون کړی وو، په پیل کي د ګمرکونو او عوایدو معین ګډونوالو ته د ښه راغلاست ترڅنګ وویل، چي د چارو د لا ښه والي له پاره د اړوندو ریاستونو تر منځ همغږي اړینه ده او ټولو مسئولینو ته ئې سپارښتنه وکړه، چي د دې ناستو پرېکړي پر خپل وخت سره پلي کړي.
ور پسې د تېري ناستي د پرېکړو په اړه بحث او خبري وسوې او د ټاکل سویو پلاوو راپورنه واورېدل سول.
همدارنګه په دې ناسته کي د اسیکوډا په سیسټم کي د نفتي او سوداګریزو جوازونو د ثبت پر څرنګوالي، د صنعتي فابریکو له لوري د خامو موادو پر واردولو او په دې برخه کي پر سته ستونزو او حل لارو، د عالیقدر امیرالمؤمنین (حفظه الله) د (۱۷) مادهییز حکم پر پلي کېدو او یو شمېر نورو موضوعاتو بحث ترسره او په اړه ئې اړیني پرېکړي وسوې.
د یادوني وړ ده، چي دغه ناستي د ګمرکونو او عوایدو معینیت د اړوندو ریاستونو تر منځ د ګډو همکاریو د پیاوړي کولو په موخه کېږي، چي دغه لړۍ به په راتلونکي کي هم دوام ولري.
