د کورنۍ پلټني لوی ریاست د (۲۰۴) واحدونو او مراجعو پلټنه کړې ده!
د غویي ۱۶مه ۱۴۰۴ هـ.ل
د مالیې وزارت د کورنۍ پلټني لوی ریاست، د کورنۍ پلټني له ملي او نړیوالو معیارونو او اصولو سره سم د دغه وزارت اړوندو واحدونو د مالي او اداري چارو د پلټني مسئولیت په غاړه لري.
دغه ریاست توانېدلی، چي د تېر (۱۴۰۳ هـ.ل) کال په اوږدو کي د منظور سوي کلني پلان پر بنسټ؛ د ګمرکونو، مستوفیتونو، مالیاتي حوزو، د ولسوالیو د عوایدو مدیریتونو، مرکزي ریاستونو، معلوماتي سیسټمونو، امارتي املاکو او پراختیايي پروژو په ګډون، په ټولیز ډول د (۲۰۴) واحدونو او مراجعو پلټنه ترسره او د اصلاح په موخه ئې د پلټني ادارو ته اړیني سپارښتني او مشورې ورکړې.
سربېره پر دې، د کورنۍ پلټني لوی ریاست له اصولو سره سم د غیر پلاني پلټني (ځانګړو موضوعاتو او شکایتونو) د څېړلو مسئولیت هم لري، چي په یاده برخه کي د (۶۵) ځانګړو موضوعاتو څېړنه ترسره او د مراجعینو شکایتونو ته پر وخت رسېدنه سوې ده.
همدارنګه یاد ریاست د (۲۰) بودیجوي واحدونو د کورنيو پلټونکو د مسلکي ظرفیت لوړوني په موخه ځانګړي روزنیز پروګرامونه دایر کړي دي، چي په یاده برخه کي ئې ګټوري پایلي لرلي دي.
د یادولو ده، چي د کورنۍ پلټني لوی ریاست تل هڅه کوي، چي د چارو له اغېزمنتیا او د بیت المال له ساتني څخه ډاډ ترلاسه کړي او د مالیې وزارت په اړوندو واحدونو کي د بشپړي روڼتیا رامنځته کولو او د کم کارۍ په وړاندي جدي مبارزه وکړي.
