د کندهار ولایت د ګمرک او مستوفیت د وضعیت ارزولو په موخه دې ولایت ته د مالیې وزارت د سرپرست سفر
د مالیې وزارت سرپرست ښاغلي محمد خالد پاینده، د کب میاشتې په ۱۷ مه نېټه کندهار ته د دې ولایت د ګمرک او مستوفیت د ارزولو په موخه سفر وکړ.
په دې سفر کې یې لومړی د کندهار له والي ښاغلي روح الله خانزاده، سره د یاد ولایت د ګمرک او مستوفیت د ارزونې په تړاو خبرې او د نظر تبادله وکړه.
همدا شان یې د لیدنو په لړ کې د خصوصي سکټور له استازو او ملي سوداګرو سره په لیدنه کې دوی ته د اسانتیاوو په رامنځته کولو، د ډیجیټلي تلو د وضعیت ارزولو، ملي عوایدو، د ګمرکي تعرفې په یوشان کولو او دې ته ورته نورو اړینو موضوعاتو په تړاو خبرې او د نظر تبادله وکړه.
د مالیې وزارت سرپرست د خصوصي سکټور د استازو او ملي سوداګرو د ستونزو او وړاندیزونو له اورېدو وروسته، دوی سره ژمنه وکړه، چې د هیواد نافذه قوانینو او مالي امکاناتو په پام کې نیولو سره به یې ستونزو ته رسېدنه وشي.
په پای کې د مالیې وزارت سرپرست د کندهار ولایت له ګمرک او مستوفیت څخه لیدنه وکړه او د شته ستونزو لپاره یې اړوندو مسؤلینو ته اړینې لارښوونې هم ورکړې.
