د کابل او د کابل نړیوال هوایي ډګر د ګمرکونو له پاره نوي رئیسان معرفي سول!
د مالیې وزارت د مقام په وړاندیز او د ا.ا.ا د ریاست الوزراء لوړ مقام په منظورۍ کار اهل کار ته د سپارلو او د کارکوونکو ترمنځ د تجاربو شریکولو په موخه مولوي علي احمد منیب د کابل ګمرک او محمد داؤد ایوبي د کابل نړیوال هوایي ډګر ګمرک له پاره د نویو رئیسانو په توګه وټاکل سول.
یاد رئیسان پرون د ګمرکونو لوی رئیس الحاج مفتي عبدالمتین سعید له لوري د یادو ګمرکونو کارکوونکو ته ور وپېژندل سول، چي د کابل نړیوال هوایي ډګر ګمرک د رئیس په پېژند غونډه کي د کابل نړیوال هوایي ډګر د لوی ریاست مرستیال مولوي محمد یاسین ثاقب هم ګډون کړی وو.
د ګمرکونو لوی رئیس د یادو ګمرکونو د دواړو رئیسانو د تر سره کړو کارونو ستاینه او نویو رئیسانو ته ئې د الله (ج) له درباره په اړوندو چارو کي د بریالیتوب هیله وکړه. نوموړي د کابل او د کابل نړیوال هوایي ډګر د ګمرکونو کارکوونکو ته سپارښتنه وکړه، چي ټولي چاري په پوره صداقت او ایماندارۍ سره تر سره کړي او په ټولو برخو کي له خپلو مسؤلینو څخه اطاعت او له دوی سره پوره همغږي وکړي.
