د پنځمي دورې مالیاتي محاسبینو ته د فعالیت جوازونه ورکړل سول
د مالیې وزارت د عوایدو لوی ریاست له لوري د پنځمې دورې (۲۸) تنو مالیاتي محاسبینو ته د فعالیت جوازونه ورکړل سول.
په همدې مناسب د ګمرکونو او عوایدو ملي اکاډمي کي غونډه جوړه سوې وه، چي پکښي د عوایدو لوی رئیس الحاج شیر محمد مشفق، د عوایدو عملیاتي مرستیال معراج محمد معراج، د عوایدو لوی ریاست تخنیکي مرستیال عبدالولي نوري، د ولایتونو د عوایدو د پراختیا او همغږۍ رئیس حافظ شاه حسین، د عوایدو د حقوقي خدمتونو رئیس ندا محمد صدیقي او مالیاتي محاسبینو ګډون کړی وو.
په پیل کي د عوایدو لوی رئیس الحاج شیر محمد مشفق خبرې وکړې او مالیاتي محاسبینو ته په خطاب کي یې وویل: د مسؤلیت اړوند کومې زده کړي مو چي ترلاسه کړي، نظام ته د رښتیني خدمت په لاره کي یې عملي کړي او د خپل مسؤلیت اړوند مالیه ورکوونکو ته سمي لارښووني وکړئ او په سپارل سوي مسؤلیت کي رښتینولي او حقیقت ویل رعایت کړئ.
د عوایدو لوی ریاست تخنیکي مرستیال عبدالولي نوري وویل، چي مالیاتي محاسبین د مالیه ورکوونکو او مالیاتي ادارې ترمنځ د یو ارتباطي پل حیثیت لري. نو باید هڅه وکړي تر څو د مالیاتي ادارې او مالیه ورکوونکو ترمنځ د اعتماد فضاء رامنځته کړي او د دوه اړخیزو ګډو همکاریو زمینه برابر کړي؛ معتبر اسناد چمتو کړي او د مالیه ورکوونکو محرم اسناد خوندي وساتي او په دې برخه کي پر وخت چاري ترسره کړي.
