د پلټني د سپارښتنو د تطبیق تعقیب کمېټې غړو بغلان، جوزجان او سرپل ولایتونو ته سفر وکړ
د پلټني سپارښتنو د تطبیق تعقیب کمېټې د ولایتي سفرونو په لړ کي دا ځل د (Audit Follow-up) په موخه د مالیې وزارت د کورنۍ پلټني لوی ریاست د عوایدو او ګمرکونو پلټني رئيس محمد نادر همایون په مشرۍ یو پلاوي چي د دې ریاست د بودیجې او خزاینو پلټني ریاست سرپرست سید احمدالله یې هم ملتیا کوله بغلان، جوزجان او سرپل ولایتونو ته سفر وکړ.
د سفر په ترڅ کي د کورنۍ پلټني لوی ریاست پلاوي د بغلان، جوزجان او سرپل ولایتونو له مستوفیتونو څخه لیدنه وکړه او د تېرو پلټنو په ترڅ کي د پلټونکو له لوري د ورکړل سوو اصلاحي سپارښتنو تطبیق یې تعقیب کړ. د کورنۍ پلټني لوی ریاست پلاوي د یادو ادارو له مسؤلینو څخه وغوښتل چي د پلټني د مؤثریت او چارو د سمون په موخه د پلټني سپارښتني په ټاکلې موده کې تطبیق او راپور یې له مرکز سره شریک کړي.
د یادولو وړ ده، چي د پلټني د تعقیب کمېټه د مالیې وزارت په چوکاټ کي رامنځته سوې چي د پلټني د چاري د اغیزمنتیا په خاطر د پلټونکو له لوري اړونده ادارو ته د ورکړل سوو اصلاحي سپارښتنو تطبیق په منظمه او دوامداره توګه څاري او راپور یې د وزارت له مقام سره شریکوي.
