د هوټلونو، تېلو او ګازو پمپ سټېشنونو له پاره د انتفاعي او ثابتي مالیې په برخو کي د پام وړ تخفیفونه رامنځته سول!

د مالیې وزارت په وړاندیز او د عالیقدر امیرالمؤمنین (حفظه الله) د حکم پر بنسټ د هوټلونو، رسټورانټونو، تېلو او ګازو پمپ سټېشنونو له پاره د انتفاعي او ثابتي مالیې په برخو کي د پام وړ تخفیفونه رامنځته سول.
په همدې موخه د حکومت د اطلاعاتو او رسنیو په مرکز کي رسنیزه غونډه جوړه سوه، چي پکښې د ریاست الوزراء اداري مرستیال مولوي عبدالسلام حنفي، د مالیې وزارت د ګمرکونو او عوایدو معین ملا عبدالقاهر حاجي ادریس، د هوټلونو، تېلو او ګازو پمپ سټېشنونو استازو او یو شمېر امارتي مسئولینو ګډون کړی وو.
د مالیې وزارت د ګمرکونو او عوایدو معین وویل، چي د اسلامي امارت تګلاره او پالیسي ولس ته په بېلابېلو برخو کي اسانتیاوي برابرول دي او د دوی په غوښتنه د دغه وزارت له کړنلارو سره سم ټولي قانوني اسانتیاوي ورته چمتو کوي. هغه زیاته کړه، چي د همدې اسانتیاوو په دوام دا دئ، د مالیې وزارت په وړاندیز او د عالیقدر امیر المؤمنین (حفظه الله) د حکم پر بنسټ د تېلو او ګازو پمپ سټېشنونو د ثابتي مالیې او د رسټورانټونو د انتفاعي مالیې په برخه کي د پام وړ تخفیفونه رامنځته سول، چي پخوا به له هغو هوټلونو او سیارو رسټورانټونو څخه، چي  ربعوار خرڅلاو به ئې د (۷۵۰۰۰۰) افغانیو څخه کم وو، (۲٪) انتفاعي مالیه اخیستل کېده او په هغه صورت کي، چي ربعوار خرڅلاو به ئې د (۷۵۰۰۰۰) افغانیو څخه زیات وو د (۵٪) مالیې تابع وو، چي د عالیقدر امیرالمؤمنین (حفظه الله) د نوي حکم پر بنسټ د ټولو هوټلونو له پاره (۲٪) انتفاعي مالیه وټاکل سوه.
همداراز به د تېلو او ګازو پمپ سټېشنونو له في لېټر څخه (۰،۶٪) ثابته مالیه اخیستل کېده، چي د نوي حکم پر بنسټ، دغه کچه (۰،۳٪) ته راټیټه سوه.
ور پسې د ریاست الوزراء اداري مرستیال د افغانستان اسلامي امارت له لوري د خصوصي سکټور له پاره د بېلابېلو برخو (اصنافو، شرکتونو، ښوونیزو، تحصیلي او روغتیایي بنسټونو) ته په مالیاتي برخو کي د معافیتونو او تخفیفونو یادونه وکړه او دا ئې د ولس له پاره د اسانتیاوو او مهربانۍ څرګندي بېلګي یادي کړې. نوموړي ټینګار وکړ، چي مالیه ورکوونکي هم باید خپل مالیاتي مکلفیتونه پر ټاکلي وخت سره سرته ورسوي.
د هوټلونو په استازولۍ د افغانستان د کسبګرو او دوکاندارانو د خوني لوی رئیس حاجي شېرین آغا سخي او د تېلو او ګازو پمپ سټېشنونو په استازولۍ حاجي مسعود راحت خبري وکړې او په یادو برخو کي ئې د رامنځته سويو تخفیفونو د یو ځل بیا رامنځته کولو له امله د اسلامي امارت له مشرتابه او مالیې وزارت څخه مننه وکړه او ژمنه ئې وکړه، چي مالیه به پر ټاکلي وخت د امارت خزانې ته تسلیموي او له نظام سره به همکاري کوي.
دغه رسنیزه غونډه د خیر دعايې په لوستلو سره پای ته ورسېده.