د مرکزي اسیا اقتصادي او سیمه ایزو همکاریو سازمان (CAREC)، اسیا پراختیایي بانک او کریک انسټیټیوټ د لوړ پوړو چارواکو ناسته
د مالیې وزارت مالي مرستیال او د کریک پروګرام نوبتي رئیس ښاغلي عبدالحبیب ځدراڼ په مشرۍ د غړو هیوادونو د استازو په حضور کې د مرکزي اسیا اقتصادي او سیمه ایزو همکاریو سازمان (CAREC)، اسیا پراختیایي بانک او کریک انسټیټیوټ د لوړ پوړو چارواکو ناسته د تلې میاشتې په ۲۹ مه نېټه د ویډیو کنفرانس له لارې ترسره شوه.
په دې ناسته کې، د جندر په ستراتېژیو، تر ۲۰۳۰ کال پورې د غړیو هیوادونو لپاره د دې سازمان د توریزم او روغتیا په تړاو بحث او د نظرونو تبادله وشوه.
د مالیې وزارت مالي مرستیال، د ټرانسپورټ، انرژۍ او سیمه ایز اتصال له لارې د دې سازمان د ستراتېژۍ پلي کولو او ملاتړ لپاره د افغانستان د همکاریو ډاډ ورکړ. په دې ناسته کې پرېکړه وشوه، چې د دې حوزې د وزیرانو ناسته دې د روان کال د ډسامبر میاشتې په ۷ مه نېټه د افغانستان د مالیې وزیر په مشرۍ ترسره شي، چې په هغه کې به د یادو ستراتېژیو د نهایي کولو په تړاو پرېکړه وشي.
