د مالیې وزارت نوماند وزیر او سرپرست د افغانستان لپاره د ملګرو ملتونو سازمان له ځانګړې استازې سره د پیژندنې لیدنه وکړه
د مالیې وزارت نوماند وزیر او سرپرست ښاغلي عبدالهادي ارغندیوال نن د غویي میاشتې په ۱۷ مه نېټه د افغانستان لپاره د ملګرو ملتونو سازمان له ځانګړې استازې اغلی دیبورا لیونز سره د ویډیو کنفرانس له لارې خبرې وکړې.
په پیل کې د افغانستان لپاره د ملګرو ملتونو سازمان ځانګړې استازې ښاغلي ارغندیوال ته د مالیې وزارت د تصدۍ سپارلو مبارکي ورکړه او زیاته یې کړه چې په دې ستونزمن وخت، د کرونا ویروس د خپریدو ګواښ او د روان کال په پای کې د افغانستان لپاره د پراختیایې کنفرانس جوړیدل یو لوی مسؤلیت دی او زه ډاډ لرم چې تاسو یې په سمه توګه مدیریت کولی شئ. نوموړې ژمنه وکړه چې موږ به د پخوا په شان د افغانستان له حکومت او مالیې وزارت سره د کرونا ویروس د خپریدو په مخنیوي او د افغانستان لپاره د پراختیایې کنفرانس په تخنیکي برخو کې همکاري وکړو.
د مالیې وزارت سرپرست له نوموړې څخه د مننې تر څنګ وویل چې د کرونا ویروس سره د مبارزې په برخه کې مالیې وزارت د بودیجوي امکاناتو برابرلو مسؤلیت لري. نوموړي زیاته کړه چې په هیواد کې د یاد ویروس خپریدل په اقتصادي وضعیت او ملي عوایدو باندې منفي اغیزه کړې خو بیا هم د تېر کال په پرتله د ملي عوایدو د راټولیدو وضعیت دومره بد نه دی او موږ هیله لرو چې په نږدې راتلوونکی کې به په روان وضعیت کې مثبت بدلون راشي.
په پای کې دواړو لوریو ټینګار وکړ چې مالیې وزارت، د افغانستان لپاره د ملګرو ملتونو سازمان دفتر او د افغانستان په هلکه د پراختیایې کنفرانس لپاره د فنلند هیواد ځانګړی استازی به د مرسته کوونکو هیوادونو او بنسټونو له استازو سره په جلا جلا ډول وګوري څو افغانستان وکولی شي هغه هیلې چې له یاد کنفرانس څخه یې لري تر لاسه کړي.
