د مالیې وزارت له لوري د مستوفیتونو مالي امرینو ته روزنیز ورکشاپ ترسره سو
د یوې سالمي ادارې د رامنځته کولو او دوام په موخه د مالیې وزارت له لوري کارکونکو ته په بېلا بیلو برخو کي د ظرفیت لوړوني پروګرامونه په لاره اچول سوي دي، چي دا ځل د مالیې وزارت د خزاینو لوی ریاست او بشري سرچینو ریاست په ګډه د مستوفیتونو مالي امرینو ته لس ورځینی روزنیز ورکشاپ ترسره کړ.
په دغه روزنیز ورکشاپ کي د ولایتونو مستوفیتونو مالي امرینو ته د مجربو ترینرانو له لوري د مهمو مالي مسائلو؛ لکه تخصیصاتو، لګښتونو، حوالو، د قطعې تآدیاتو، تآمیناتو، ضمانتونو، بانکي تطبیقاتو او د افغانستان د مالي ادارې د معلوماتو سیستم یا افمیس په تړاو په انلاین بڼه روزنه ورکړل سوه.
د دغه لس ورځني روزنیز ورکشاپ له پای ته رسېدو وروسته د مستوفیتونو مالي امرینو څخه د ورکړل سوي روزني اړوند مالي برخو کي ازموینه اخیستل کیږي، تر څو په مالي برخو کي د مسؤلینو د ظرفیت ارزونه تر سره سي او په راتلونکي کي د ظرفیت لوړوني اړینو پروګرامونه او د مسلکي مالي امرینو ګمارنو ته زمینه برابره سي.
