د مالیې وزارت سرپرست د عامه ساتنې ملي تصدۍ له عمومي رئیس سره لیدنه وکړه
د مالیې وزارت سرپرست محمد خالد پاینده، چې د مالیې وزارت عوایدو او ګمرکونو مرستیال عالم شاه ابراهیمي هم ورسره وو د عامه ساتنې ملي تصدۍ له عمومي رئیس برید جنرال احمد فیصل خان الله داد، سره د عوایدو او ګمرکونو په معینیت کې لیدنه وکړه.
په دې لیدنه کې دواړو لوریو د اسلام کلا په ګمرک کې د غیر قانوني اخیستنو په مخنیوي، په یاد ګمرک کې د عامه ساتنې قطعې ته د امکاناتو او تجهیزاتو په برابرولو، په ګمرکي چارو کې د نورو ادارو نه لاسوهنې او یو شمېر نورو اړوندو مسایلو په تړاو خبرې او د نظرونو تبادله وکړه.
د عامه ساتنې ملي تصدۍ عمومي رئیس د مالیې وزارت له سرپرست سره ژمنه وکړه، چې د یادو برخو د امنیت ټینګښت، غیر قانوني کړنو د مخنیوي او د بنسټونو د ساتنې په برخه کې به هر راز همکاري کوي.
د مالیې وزارت سرپرست د عامه ساتنې له ملي تصدۍ مننه وکړه او ویې ویل؛ اړتیا ده چې له فساد سره د مبارزې او غیر قانوني کړنو د مخنیوي په برخه کې لازمه همکاري او همغږي رامنځته کړو.
