د مالیې وزارت سرپرست د سویلي اسیا په چارو کې د نړیوال بانک له معاون سره لیدنه وکړه
د مالیې وزارت سرپرست محمد خالد پاینده، د سویلي اسیا په چارو کې د نړیوال بانک له معاون هارټویګ شیفر، سره لیدنه او خبرې وکړې.
په دې لیدنه کې چې د مالیې وزارت د پالیسۍ مرستیال او د افغانستان لپاره د نړیوال بانک رئیس او مرستیال هم حضور درلود، دواړو لوریو د افغانستان خلکو ته د کرونا واکسین په چمتو کولو او پرمختګ، د نړیوال بانک له لوري تمویلېدونکو پروژو پلي کولو په چټکېدو، د ملي لومړیتوبونو په پام کې نیولو سره د نړیوال بانک څلورکلنې ستراتېژۍ په نهایي کولو او یو شمېر نورو اړوندو مسایلو په تړاو بحث او د نظرونو تبادله وکړه.
