د مالیې وزارت د رهبرۍ نوبتي ناسته ترسره سوه
د مالیې وزیر الحاج ملا هدایت الله بدري، په مشرۍ د مالیې وزارت د رهبرۍ نوبتي ناسته، چې د یاد وزارت یو شمېر رئیسانو او مسؤلینو هم ګډون درلود، د قران عظیم الشان د مبارکو ایاتونو په تلاوت پیل او ترسره سوه.
د ناستې په پیل کې د اړوندو مسؤلینو له لوري، ګډونوالو ته لومړی د تېرو ناستو د پرمختګونو، پرېکړو او لاسته راوړنو بشپړ راپور وړاندې او ورپسې د کابینې د ۱۴۴۳/۶/۲۱ نېټې، ۲۰مې مصوبې د اجنډا له مخې د مالیې وزارت رهبرۍ د هدایت پر بنسټ د هیواد په لیرې پرتو سیمو کې دولتي مامورینو ته چې په بانکي حسابونو کې یې ستونزه ده د معتمد پر واسطه د معاشونو د ورکړې، د عوایدو عالي شورا او ولایتي کمېټو د بیا احیاء غوښتنې، د اصنافو د مالیې نورم کمېدلو او جریمو د معافیت پرانیست غونډې پر پرانیستلو او یو شمېر نورو اړوندو مسایلو په تړاو بحث او د نظرونو تبادله وسوه.
د مالیې وزیر الحاج ملا هدایت الله بدري، د تېرو ناستو د لاسته راوړنو او پرمختګونو ته د خوښۍ ترڅنګ وویل، چې په اړوندو برخو کې دې یو ګډ کمېسیون جوړ سي، ترڅو د کارونو او فعالیتونو ارزونه وکړي او د فعالیتونو او ټکنیو فعالیتونو په هکله ډاډ ترلاسه کړي.
دا راز د خزاینو، مالي او اداري او د عوایدو د انسجام او همغږۍ ریاستونو ته دنده وسپارل سوه، ترڅو په هغو اولسوالیو کي چې بانکي خدمتونو ته د ماليې وزارت د کارکوونکو لاسرسی محدود دی کره معلومات ترلاسه کړي، چي څنګه کولای سو د دوی د معاشاتو ورکړه تر سره کړو او تر څنګ یې د عوایدو عالي شورا او ولایتي کمېټو د بیا احیاء په ګټو او زیانونو پلټنه وکړي، چې فعالول یې زیانمن که ګټور دي.
همداشان د دولتي شرکتونو له عمومي ریاست څخه وغوښتل سول، ترڅو یوه کړنلاره جوړه کړي چې طلبات یې زیات او په دې برخه کې لا نور هم چټک ګامونه پورته کړي.
د ناستې په پای کې پرېکړه وسوه، چې د دغې ناستې بشپړ راپور او پرمختګونه دې په راتلونکو ناستو کې په ډاګه او پایلې دې شریکې کړای سي.
