د مالیاتي شخړو د حل بورډ ۴۱ مالیاتي شخړو ته رسېدنه کړې ده!
د وږي ۳مه ۱۴۰۴هـ.ل
د مالیې وزارت د مالیاتي شخړو د حل بورډ، چي له پنځو متخصصو غړو څخه جوړ دئ، د مالیاتي شخړو د حل او د مالیاتي عدالت رامنځته کولو، د مالیاتي اطاعت پذیرۍ کچي لوړولو، د مالیاتي قوانینو له ښه او دقیق پلي کېدو څخه د ډاډ ترلاسه کولو، د مالیه ورکوونکو او مالیاتي ادارو ترمنځ د باور رامنځته کولو، په خصوصي سکټور کي د پانګوني د جذب ملاتړ او د مالیاتو په ورکولو کي د مالیه ورکوونکو رضایت ترلاسه کولو له پاره اغېزمن او ګټور فعالیتونه ترسره کوي.
د مالیاتي شخړو د حل بورډ د (۱۴۰۴ هـ.ل) کال له پیل څخه تر زمري میاشتي پوري د تقنیني اسنادو په رڼا کي شاوخوا (۴۱) قضیې حل کړي دي، چي ډېری متعرضو مودیانو د بورډ له پرېکړو څخه خوښي څرګنده کړې او حکم سوي پیسې ئې بیت المال ته سپارلي دي.
د یادوني وړ ده، چي د مالیاتي شخړو مسلکي او تخنیکي حل دوه اړخیزي پایلي لري، یعني له یوې خوا پر ملي بودیجه او د مالیې وزارت د محاسباتي سیسټم (د نقدینګی مدیریت) باندي مثبتي اغېزې لري، پاتي عواید ترلاسه کېږي او له بلي خوا د مالیه ورکوونکو او مالیاتي ادارو ترمنځ د باور په رامنځته کولو سره د خصوصي سکټور رضایت تر لاسه کېږي.
