د روزنیز پروګرام دوهمي دورې له بشپړاوي وروسته د ۱۱ مستوفیتونو له مالي او حسابي کارکوونکو څخه ازموینه واخیستل سوه!
د مالیې وزارت د خزاینو ریاست د بشري سرچینو ریاست په همکارۍ د (پنجشیر، بدخشان، تخار، کندوز، بغلان، سمنګان، بلخ، بامیان، سرپل، جوزجان او دایکندي) ولایتونو د (۱۱) مستوفیتونو مالي او حسابي برخي کارکوونکو د ظرفیت لوړوني په موخه یو روزنیز پروګرام جوړ کړی وو، چي د دغه پروګرام له بشپړاوي وروسته له یادو کارکوونکو څخه ازموینه واخیستل سوه.
دغه ازموینه، چي د خزاینو لوی ریاست د مسؤلین په شتون کي د ګمرکونو او عوایدو په ملي اکاډمۍ کي واخیستل سوه، په ټوله کي د مستوفیتونو د مالي او حسابي برخي (۵۴) تنو کارکوونکو پکښې ګډون کړی وو.
هغه کسان، چي له دې روزنیز پروګرام څخه ئې په سمه توګه ګټه پورته کړې او په ازموینه کي بریالي سي، خپلي دندې ته به دوام ورکوي او د هغو کسانو پر ځای به نوي کسان وګومارل سي چي په ازموینه کي نه وي بریالي سوي.
د یادوني وړ ده، چي د یو شمېر نورو ولایتونو د مستوفیتونو کارکوونکو ته به هم د مالیې وزارت د خزاینو لوی ریاست د روزنیز پروګرام دریمه دوره ډېر ژر پیل سي.
