د روان کال په لومړۍ ربعه کي د ګمرکونو چارو ۲۳ سلنه پرمختګ کړی دئ!
د روان (۱۴۰۳ هـ.ل) مالي کال په لومړۍ ربعه کي د هیواد په ګمرکونو کي د ترسره سوو چارو د تخنیکي ارزوني ناسته، د مالیې وزارت د ګمرکونو لوی رئیس الحاج مفتي عبدالمتین سعید په مشرۍ جوړه سوه
په دغه ناسته کي د روان کال په لومړۍ ربعه کي په ګمرکونو کي د تر سره سوو فعالیتونو ټولیز راپور وړاندي سو؛ په یاده موده کي د عوایدو د راټولېدو، د هیواد په ګمرکونو کي د تر سره سوي سوداګرۍ، د وارداتي توکو د ګمرکي ارزښت او د سوداګریزو محمولو د شمېر او ثبت سوي وزن په اړه بشپړ معلومات وړاندي سول، چي له مخي ئې د پروسږ کال د همدې مودې په پرتله، د ګمرکونو چاري په اوسط ډول (۲۳،۳) سلنه مثبتي وښودل سوې.
د وړاندي سوي راپور په تړاو هر اړخیز تخنیکي بحثونه وسول او د چارو د لا پرمختګ په موخه د ولایتي ګمرکونو د مسؤلینو ستونزي او وړاندیزونه واورېدل سول، چي د رهبرۍ له لوري د ستونزو د حل ډاډ ورکول سو او ور سره اړیني سپارښتني هم شریکي سوې.
