د روان مالي کال په لومړنۍ ربعه کي د ګمرکي چارو تخنیکي ارزونه وسوه!
د چنګاښ ۲۸مه ۱۴۰۴هـ.ل
د ګمرکونو او عوایدو معین الحاج مفتي عبدالمتین سعید په مشرۍ د روان (۱۴۰۴هـ.ل) مالي کال په لومړنۍ ربعه کي په ګمرکونو کي د تر سره سویو چارو د تخنیکي ارزوني ناسته د یاد معینیت د غونډو په تالار کي وسوه.
په دې ناسته کي د ګمرکونو لوی رئیس مولوي محمد حامد احمد، د ګمرکونو لوی ریاست تخنیکي او عملیاتي مرستیالانو، یو شمېر رئیسانو، آمرینو او د ویډیو کنفرانس له لاري د ولایتي ګمرکونو مسؤلینو ګډون کړی وو.
په پیل کي د ګمرکونو او عوایدو معین د ولایتي ګمرکونو د مسؤلینو له صادقانه کړنو څخه مننه وکړه. نوموړي د بهرني ټرانزیټ، د تخلف د مخنیوي او د پرچون توکو په برخو کي د سته ستونزو یادونه وکړه او په دې اړه ئې د ګمرکونو مسؤلینو ته اړیني سپارښتني وکړې.
ورپسې د ګمرکونو لوی ریاست د پلان جوړوني، پالیسۍ، څارني او ارزوني ریاست له لوري د روان مالي کال په لومړنۍ ربعه او د همدې کال د غبرګولي په میاشت کي په ګمرکونو کي د تر سره سویو فعالیتونو په تړاو ټولیز راپور وړاندي سو؛ په یاده موده کي د عوایدو راټولیدو، د هیواد په ټولو ګمرکونو کي د تر سره سوي سوداګرۍ، د وارداتي توکو ګمرکي ارزښت او د سوداګریزو محمولو د شمېر او ثبت سوي وزن په اړه غونډي ته بشپړ معلومات وړاندي سول.
همدا رنګه د چارو د لا پرمختګ په موخه د ولایتي ګمرکونو د مسئولینو ستونزي او وړاندیزونه واورېدل سول، چي د رهبرۍ له لوري د ستونزو د حل ډاډ ورکړل سو.
