د خوست، فراه او اقینې په ګمرکونو کي د اوبو د تصفیې سیسټمونه فعاله سول!
د کب ۱۹مه ۱۴۰۳هـ.ل
د مالیې وزارت د ګمرکونو لوی ریاست د (۳.۱) میلیونه افغانیو په ارزښت د خوست، فراه او اقینې ګمرګونو د کارکوونکو او مراجعینو له پاره د څښاک پاکو اوبو ته د لاسرسي په موخه د اوبو د تصفیې سیسټمونه فعاله کړل.
د اوبو د تصفیې یاد سیسټمونه په پوره معیاري ډول جوړ سوي دي، چي په یوه ساعت کي (۱۰۰۰) لیټره اوبه تصفیه کوي.
همدا شان د ګمرکونو لوی ریاست د کندهار ولایت د سپین بولدک په ګمرک کي هم د (۱.۴) میلیونه افغانیو په ارزښت د یوې حلقې برمه یې څاه د کیندلو چاري پیل کړي دي، چي په دې پروژه کي د څاه د کیندلو تر څنګ له څاه څخه د اوبو ایستلو، ذخیره کولو او نور اړین تجهیزات هم شامل دي، چي چاري به ئې تر یوې میاشتې پوري بشپړي سي.
د یادولو ده، چي له دې وړاندي په یادو ګمرکونو کي د کارکوونکو او مراجعینو له پاره د څښاک پاکو اوبو زمینه نه وه برابره، چي کارکوونکي او مراجعین ئې له ستونزو سره مخ کړي وو.
