د بودیجې جوړوني د ریفورم پلي کولو وروستۍ تخنیکي او مشورتي ناسته ترسره سوه

 بودیجې لوی ریاست د ناستو په دوام، له بودیجوي واحدونو سره د بودیجې جوړوني د ریفورم پلي کولو وروستۍ تخنیکي او مشورتي ناسته د خوندیتوب او عامه نظم سکټور د مسئولینو په ګډون د ملي بودیجې لوی ریاست د کنفرانسونو په تالار کي ترسره سوه.
د ملي بودیجې د پلان او ریفورم رئیس پوهنمل غلام عمر عبدالله د ملي بودیجې په جوړښت کي د ریفورم پر ارزښت او د ملي بودیجې په پلي کولو او اجراء کي د ریفورم د اغېزمنتیا او مثمریت په اړه خبري وکړې او زیاته ئې کړه، چي ملي بودیجه ملي امانت او د ملت حق دئ، په ښه ډول ئې پلي کول زموږ شرعي او انساني دنده ده او په دې برخه کي باید جدي هڅي وکړو.
ورپسې د ملي بودیجې لوی ریاست تخنیکي ټیم د اړوند سکټور له ادارو سره د ادارو د فعالیتونو او ماموریتونو پر بنسټ د اصلي او فرعي برنامو په نومونو کي د بدلون، په ادارو کي د ورته برنامو د شتون او د هغوی د ستونزو په اړه هر اړخیز بحث او لازمي لارښووني وکړې.
په پای کي پرېکړه وسوه، چي په نږدې راتلونکي کي دي له ټولو ادارو سره انفرادي ناستي هم ترسره سي. همدا راز ادارو هم ژمنه وکړه، چي د برنامې له مخي به د بودیجې د ریفورم پلي کولو په برخه کي هر اړخیزي همکارۍ کوي.