د اړوندو مختلفو ادارو ترمنځ د زېربناوو شریکولو ځانګړې ناسته وشوه
د مالیې وزارت پالیسۍ معینیت عامه پانګونې او زېربنا عمومي رئیسې کبرا توسلي په مشرۍ، چې د کابل ښاروالۍ، د افغانستان برېښنا شرکت، ښاري اوبو رسونې ریاست، افغان تیلیکام شرکت او د مخابراتي خدمتونو د تنظیم ادارې (اترا) استازو هم حضور درلود، د زېربناوو شریکولو ځانګړې ناسته وشوه.
په دې ناسته کې له اوولسمې ناحیې سره د یوولسمې ناحیې سړک نښلولو په ډیزاین چې ښایي د کابل ښاروالۍ له لوري ډیزاین شي بحث او خبرې وشوې.
د پالیسۍ معینیت د عامه پانګونې او زېربنا عمومي ریاست، یاده پروژه د دې ناستې په ترڅ کې د اوبو رسونې او ښاري کانالیزاسیون، د افغانستان برېښنا شرکت، ښاري اوبو رسونې ریاست او افغان تیلیکام له شرکت سره شریکه کړې او له اړوندو ادارو یې وغوښتل څو د خپلو پروژو تخنیکي اړخونه او مشخصات د کابل ښاروالۍ ته واستوي ترڅو د یاد سړک د ډیزاین په جوړولو کې کار ترې واخیستل شي.
له پورتنیو یادو شویو ادارو سره د پروژو شریکول د ډیزاین په پړاو کې مرسته کوي، څو انفرادي پلانونه د انفرادي پروژو په چوکاټ کې د یوې واحدې پروژې په چوکاټ کې د واحد پلان په توګه پلي شي او په همدې ترتیب د پورتنیو ذکر شویو پروژو د پلي کولو پر مهال زیاتې پیسې د ادارو له لوري په انفرادي توګه لګول کېږي، وسپمول شي او د کار د ټکني کېدو او بیا ځلي کار مخنیوی وشي.
