د افغانستان لپاره د ۲۰۲۰ کال نړیوال کنفرانس د جوړیدو په موخه د چمتو والي مقدماتي لومړنۍ ناسته وشوه
د افغانستان لپاره د ۲۰۲۰ کال نړیوال کنفرانس د جوړیدو په موخه د چمتو والي مقدماتي لومړنۍ ناسته د کب میاشتې په ۲۲ مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د افغانستان لپاره د ملګرو ملتونو سازمان ځانګړي استازي ښاغلي تداماچي یاماماتو او د افغانستان لپاره د فنلنډ هیواد سفیر ښاغلي پککا کوسونن په ګډون په مالیې وزارت کې جوړه شوه.
په دې ناسته کې د افغانستان لپاره د ۲۰۲۰ کال د نړیوال کنفرانس په اجنډاء او مقدماتي چمتو والي هر اړخیزې خبرې وشوې. پریکړه وشوه چې په افغانستان کې د ملګرو ملتونو سازمان او د فنلنډ سفارت سره په ګډه یو تخنیکي ټیم جوړ شي او یادو مواردو په اړه دې عملي ګامونه واخیستل شي.
د یادونې وړ ده چې د افغانستان لپاره د ۲۰۲۰ کال نړیوال کنفرانس د هیواد اقتصادي او مالي مسایلو، د افغانستان د ځان بسیاینې د پنځه کلنې استراتیژۍ او د ۲۰۲۵ کال پورې د نړیوالې ټولنې د مرستو دوام په اړه د ۲۰۲۰ کال په پای کې د افغانستان – فنلنډ په ګډ کوربه توب په جینیوا کې جوړ شي.
