د اسلام کلا په ګمرک کې د اور لګيدنې تازه جزیات
د مالیې وزارت له لوري اسلام کلا ګمرک ته د لېږل شوي تحقیقاتي پلاوي له خوا ترلاسه شویو وروستیو معلوماتو پر بنسټ، که څه هم له دې پېښې د رامنځته شویو زیانونو په تړاو کوم کره معلومات نه شته خو له نېکمرغه اور لګېدنه مهار شوې. بل خوا د مختلط پلاوي په ترکیب کې د هرات ولایت مقام، د مالیې وزارت د ګمرکونو عمومي رئیسه او د اړوندو ادارو مسؤلین شامل دي، دوی د رامنځته شویو زیانونو او پېښې څرنګوالي په موخه لېږل شوی وو، اوس مهال په سیمه کې شتون لري او د دوی له پلټنو وروسته به بشپړ جزٸیات د ټولنیزو رسنیو له لارې له خلکو سره شریک شي.
مالیې وزارت د سوداګرو د توکو د ګمرکي پړاوونو په ترسره کولو کې له ځنډ څخه د مخنیوي په موخه بدیل موقعیت (د روزنک او هرات محصولي ګمرک) په پام کې نیولي دي او ملي سوداګر کولی شي خپل وارداتي او صادراتي توکې له همدې لارو طى مراحل کړي.
