افغانستان او اذربایجان د اقتصادي او سوداګریزو همکاریو په دودولو او پراخولو هوکړه وکړه
د افغانستان او اذربایجان د اقتصادي او سوداګریزې همکارۍ په تړاو د لومړي کاري ګروپ ناسته پرون ورځ پیل او نن د چنګاښ میاشتې په ۲۵ مه نېټه د دواړو لوریو له تخنیکي بحثونو وروسته د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسو محمد همایون قیومي، او د اذربایجان د اقتصاد وزارت مرستیال ښاغلي صاحب محمدوف، ترمنځ د اقتصادي او سوداګریزې همکارۍ دودولو او پراخولو دوه اړخیزه پروتوکول لاسلیک شو.
په دې ناسته کې دواړو لوریو، د سوداګرۍ او دوه اړخیزه پانګونې حد اکثر حجم په زیاتېدو، د افغانستان له لارې د سویلې اسیا بازارونو ته د صادراتو او وارداتو په اسانتیاوو او همکارۍ، په بېلابیلو سکټورونو کې د اذربایجان په پانګونه، دوه اړخیزه ګمرکي همکاریو په پراختیا، د حکومت په حکومت مېکانیزم له لارې د افغانستان له خوا د اذربایجان د نفتو په پېرلو، د ټرانسپورټ او معلوماتي ټکنالوژۍ په برخه کې په دوه اړخیزه همکاریو، اړیکو او عامه خدمتونو، لوړو زده کړو او نورو اړینو برخو په تړاو بحث او خبرې وشوې.
د دواړو لوریو ترمنځ په لاسلیک شوي پروتوکول کې د ناستې یاد شوي موضوعات شامل وو.
همدا شان مالیې وزارت سرپرست د اذربایجان د پخواني ولسمشر مرحوم حیدر علي اوف او د یاد هېواد د ۱۹۹۱ میلادي کال د انقلاب شهیدانو مقبرې ته ورغی او د درناوي لپاره یې په دې مقبرې د ګلو ګیډۍ کیښوده.
