ولایتونو مستوفیانو ته روزنیز ورکشاپ جوړ سو
د مالیې وزارت د بشري سرچینو ریاست د یو لړ مراسمو په ترڅ کي، د ولایتونو مستوفیانو ته روزنیز ورکشاپ د عوایدو او ګمرکونو ملي اکاډمۍ د غونډو په تالار کي جوړ کړ.
په دغو مراسمو کي اداري مرستیال مولوي حمد الله زاهد، د عوایدو لوی رئيس الحاج شېر محمد مشفق، د بشري سرچینو رئیس مولوي احمد شاه شاکر، د عوایدو لوی ریاست د حقوقي خدمتونو رئیس ندا محمد صدیقي او د ولایتونو مستوفیانو ګډون کړی وو.
د عوایدو لوی رئيس الحاج شېر محمد مشفق، په پرانیستې وینا کي وویل، چي له دغه روزنیز ورکشاپ څخه ښه ګټه واخلئ او هغه څه مو، چي زده کړل عملي ئې کړئ، ځکه له عمل پرته علم اغېز نه لري. نوموړي مستوفي صاحبانو ته په خطاب کي وویل، چي ستاسو مسؤلیت ډېر اړین دئ؛ ځکه تاسو په ولایتونو کي د مالیې وزارت استازي یاست. خپلو مسئولیتونو ته مو پام کوئ، له والي صاحبانو سره د همغږۍ ترڅنګ په حمیده اخلاقو او مهربانۍ د خلکو ستونزي ور حل کړئ.
د مالیې وزارت اداري مرستیال مولوي حمد الله زاهد، مستوفیانو ته ښه را غلاست ووايه او زیاته ئې کړه، چي الحمد الله د کمونیستي او سیوسیالیسټي نظام له پرځولو وروسته د مجاهدینو په مټ یو اسلامي او فکري نظام رامنځته سوی، چي په مالي، اداري، اقتصادي، سیاسي او ټولنیزو برخو کي بریالی دئ. هغه له مستوفیانو څخه وغوښتل، چي په ولایتونو کي د مالیې وزارت د استازو په صفت خپل کارونه په ښه او صادقانه توګه مخته یوسي او د یوه مسلمان په توګه ئې ځواب ویونکی و اوسي.
د کندهار ولایت مستوفي الحاج ملا حکمت الله آخند (ملا محمد رفیق) د مستوفیانو په استازیتوب له دغه پروګرامه خوښي څرګنده کړه او د مستوفیت د ارزښت په پام کي نیولو سره ئې خپل نظرونه او وړاندیزونه شریک کړل.
د یادوني وړده، چي دغه پرواګرام د یوې اوونۍ لپاره ترسره کېږي او د مالیې وزارت، عوایدو لوی ریاست، خزاینو لوی ریاست، بشري سرچینو ریاست، د معلوماتي ټکنالوژۍ ریاست، د لیلام آمریت د مسئولیتونو او دندو، د برسۍ د اجراآتو، قانون نافذولو، مالیاتي او غیر مالیاتي عوایدو، تدارکاتي طرزالعمل، مالي او حسابي چارو، خدماتي، قوانینو، مقررو، طرزالعملونو، د افمیس سیسټم له لاري د پروسیجرونو، د لګښتونو کاري پروسیجرونو، د تادیاتو پروسې او نورو اړینو موضوعات په تړاو مستوفیانو ته معلومات ورکول کېږي.
