د مالیه ورکونکو د شکایتونو اورېدلو ریاست په روان مالي کال کي ۶۰۰ شکایتونو ته رسېدنه کړي!
د مالیې وزارت له مسؤلیتونو څخه یو هم په اصولي بڼه د مالیې راټولول دي؛ تر څو د مالیه ورکونکو حقوق هم په بشپړ ډول په نظر کي ونیول سي او د هغوی د نا خوښۍ سبب ونه ګرځي.
پر همدې بنسټ، د مالیه ورکوونکو د حقونو د خوندیتوب او د هغوی شکایتونو ته د رسېدني په موخه د ګمرکونو او عوایدو معینیت په چوکاټ کي د مالیه ورکوونکو د شکایتونو د اورېدلو ریاست شتون لري، چي هر وخت کوم مالیه ورکوونکی د خپلي مالیې له ورکړي څخه خوښ نه وي؛ نو په ډاډه زړه (اصناف د معینیت مقام ته د عریضي له لاري) او د شرکتونو مسؤلین (د دغه ریاست د ځانګړي فورم په ډکولو سره) خپل شکایتونه له دې ریاست سره شریکوي او یاد ریاست شریک سوو شکایتونو ته، د خپل تخنیکي او مسلکي ټیم په وسیله په ټاکلي وخت کي رسېدنه کوي او د مالیه ورکونکي له حق څخه په بشپړ ډول دفاع کوي.
د شکایتونو د اورېدلو ریاست له رامنځته کېدلو څخه وروسته ډېر شمېر شکایتونو ته رسېدنه کړې ده، چي په روان (۱۴۰۲) مالي کال کي دغه ریاست ته (۸۰۰) مالیه ورکوونکو خپل شکایتونه سپارلي، چي له دې شمېر شکایتونو څخه (۶۰۰) شکایتونو ته رسېدنه سوې او پاته نور هم تر څېړنو لاندي دي.
یاد ریاست یوه مسلکي کاري کمېټه لري، چي شکایتونو ته د رسېدني او عملي څېړنو په موخه سیمي ته ځي او د شکایت اړوند ټول ابعاد په دقیق ډول څېړي؛ ترڅو د مالیه ورکوونکو بشپړ رضایت ترلاسه کړي.
د یادوني وړ ده، چي اوسمهال هر هغه مالیه ورکوونکی، چي د تثبیت سوي مالیې څخه رضایت ونه لري؛ نو په ډاډه زړه کولای سي، چي د مالیه ورکوونکو د شکایتونو د اورېدلو ریاست سره خپل شکایت شریک کړي؛ ترڅو په ټاکلې موده کي د یاد ریاست د مسلکي ټیم له لوري په سمه توګه رسېدنه ورته وسي.
.
