د مالیې په وزارت کې د ښځو د پیوستون نړیوالې ورځې نمانځنه وشوه
د مالیې په وزارت کې نن د کب میاشتې په ۱۸ مه نېټه د یو لړ مراسمو په ترڅ کې د ښځو د پیوستون نړیوالې ورځې نمانځنه وشوه.
د مالیې وزارت په خیبر هال کې په همدې تړاو جوړو شویو مراسمو کې د مالیې وزارت سرپرست ښاغلي محمد خالد پاینده، د وزارت مرستیالانو، رئیسانو او یو شمېر کارکوونکو ګډون کړی وو.
په پیل کې د مالیې وزارت د جندر امرې اغلې الهې پوپلزۍ، د مالیې وزارت مشرتابه ته د ښه راغلاست ترڅنګ، د نړۍ ټولو ښځو په ځانګړي توګه افغان ښځو ته مبارکي وویله او د مالیې وزارت مشرتابه ته یې د دې وزارت د ښځینه کارکوونکو وړاندیزونه او ستونزې وړاندې کړې.
د مالیې وزارت سرپرست ښاغلي محمد خالد پاینده، د مارچ اتمه؛ د ښځو د پیوستون نړیواله ورځ د نړۍ ټولو ښځو په ځانګړي توګه افغان ښځو ته مبارکي وویله او زیاته یې کړه، چې دا ورځ دي ټول نارینه هم د ښځو غوره مقام ته د درناوي په موخه ونمانځي.
د مالیې وزارت سرپرست زیاته کړه، چې د دې وزارت مشرتابه ژمن دی، څو د ګمارنې او پرېکړې نیونې په برخو کې د ښځو ونډه او ګډون او د مالیې وزارت د سترو پالیسیو په هکله د دوی د نظرونو ونډه زیاته کړي. همدا شان د مالیې په وزارت کې د ګټورو پروګرامونو په وړاندي کولو او ښځو پیاوړي کولو سره د دوی رول تر دې هم رغنده کړي.
د مالیې وزارت سرپرست، د دې وزارت د جندر امریت وړاندیزونه واورېدل او اداري مرستیال او د بشري سرچینو رئیس ته یې سپارښتنه وکړه، چې د نافذه قوانینو په رڼا کې دې موضوع ته رسېدنه وشي.
د دې پروګرام په پای کې شعر وینه او تمثیلي ټوټه هم وړاندي شول او د مالیې وزارت سرپرست، د نوښتګرو مېرمنو له لوري د انځوریز نندارتون جوړېدو پرانیسته او لیدنه وکړه.
