د مالیې وزارت مالي ځان بسیاینې ته ژمن او مسلکي کارکوونکي لري
د مالیې وزارت متعهد او دندو ته ژمن کارکوونکي د کوچني اختر په څلورمه ورځ په پوره لیوالتیا او غښتلې اراده خپلو دندو ته حاضر سول. دغو کار کوونکو له ورځني مهال وېش سره سم خپلي چاري پیل کړې، چي د دوی د صادقانه هڅو په پایله کي د کوچني اختر له پای ته رسېدو سره هم مهاله ( د روان مالي کال د غوایي میاشتي له ۴ -۷ نېټې پوري) په میلیونونو افغانۍ عواید را ټول کړل سول.
د را ټولو سویو عوایدو دغه رقم (۹۱۶) میلیونه افغانۍ کېږي، چي د یوې پیاوړي ژمني په پایله کي را ټول سوي او ملي خزاني ته سپارل سوي دي.
د مالیې وزارت ژمن او مسلکي کارکوونکي په هر ډول شرایطو کي، په ملي کچه و اولس ته د خدمتونو وړاندي کولو لپاره چمتو دي او خپل مسؤلیت په پوره لیوالتیا او هيوادنۍ میني سره په ښه توګه سرته رسوي.
