د اریانا افغان هوایي شرکت د ۱۴۰۰ مالي کال مدیره پلاوي لومړۍ ناسته وشوه
د مالیې وزارت مالي او عمومي ریاست سرپرست سید احسان الدین طاهري او د اریانا افغان هوایي شرکت د مدیره پلاوي رئیس په مشرۍ، چې د مدیره پلاوي ټولو غړو (اقتصاد وزارت، ملي بانک او پښتني بانک استازو) پکې ګډون درلود، د دې شرکت د ۱۴۰۰ مالي کال مدیره پلاوي لومړۍ ناسته وشوه.
د اریانا افغان هوایي شرکت د ریاست سرپرست سلیم رحیمي، په دې ناسته کې د یاد شرکت د مدیره پلاوي مخکنۍ ناستې پر پرېکړو له ځغلندې کتنې وروسته د مالي پلان، بشري سرچینو لایحې، د شرکت په ځانګړي توګه د الوتنې عملې، کارکوونکو او چلوونکو د معاشونو په سکیل او په اجنډا کې شاملو یو شمېر نورو موضوعاتو په تړاو د ناستې غړو ته د دې شرکت د مشخص وړانديز په تړاو خپل راپور وړاندي کړ.
ورپسې د دې شرکت د مدیره پلاوي رئیس سید احسان الدین طاهري، د شرکت د مدیره پلاوي له غړو د هر یوه د نظر په وړاندي کولو سره د هر مورد په تړاو لازمه او ګډه پرېکړه وړاندي کړه.
